Ересек "Гүлдер" тобы". ҰАОҚ. Тақырыбы: "Дос іздеген бота". Тәрбиеші: Сапакова А.Р.
«ДОС ІЗДЕГЕН БОТА»
Білім беру саласы: Коммуникация.
Ұйымдастырылған оқу қызметі: Драма.
Мақсаты: Балаларды ертегі мазмұны бойынша кейіпкерлердің рөлінде ойнауға үйрету. Ертегіні сахналау шеберліктерін арттыру.Нағыз дос туралы түсініктерін қалыптастыра отырып, достық сезімдеріне тәрбиелеу.
Құралдар: Сахналауға қажетті кейіпкерлер костюмдері.
Әдіс-тәсілдер: Әңгімелеу,көрсету, сахналау, мадақтау, сұрақ-жауап.
Көптілділік: Түйе-верблюд-camel, бота-верблюжонок- little camel, қозы-ягненок- lamb, лақ-козленок- kid,күшік- щенок - puppy,мысық-кошка- cat,әтеш-петух- cock, балапан-цыпленок -chick,ара-пчела- bee, дос-друг- friend.
Шаттық шеңбері.
-Балалар,сендер театрда ертегі тамашалағанды жақсы көресіңдер ме?(Иә).
-Рөлге бөлініп ойнағанды ұнатасыңдар ма?(Ұнатамыз).
-Рөлде ойнап нағыз кейіпкерге ұқсау үшін не қажет?(Кейіпкерлердің костюмін киеміз, маскасын тағамыз.Бас киімдерін қолданамыз).
-Жарайсыңдар, ал костюмсіз кейіпкерді қалай сомдап көрсетуге болады?(Қимылмен, ым-ишарамен көрсетеміз).
-Ал қимылмен көрсету деген не?(Кейіпкердің көңіл-күйін қуануды, қорқуды, таңырқауды қимылмен көрсете білу).
--Мен бірнеше сөзді айтамын,сендер қимылмен көрсетіңдер. «Ойланып тұрмын», «Сәлеметсіз бе», «тыныш», «иә», «жоқ», «болмайды», «сау болыңыз». (Балалар қимылмен көрсетеді).
-Жарайсыңдар балалар, енді театр кассасынан билет алып, көтеріңкі көңіл-күймен өз орнымызға жайғасайық. (Билеттер ертегі кейіпкері негізінде болады. Балалар кассирмен амандасып, билеттерін алады. Отырады, қол соғады).
Автор: Сәлеметсіздер ме, көрермендер! Театрға қош келдіңіздер. Сіздерді «Дос іздеген бота» ертегісін тамашалауға шақырамыз.
Автор: Ерте, ерте, ертеде боталы түйе болыпты.
Түйе:
Түйе, түйе, түйемін,
Жануармын киелі.
Жан-жағыма қараймын,
Күн мен түнді санаймын.
Автор: Түйе өзінің жібек жүнді , сүйкімді баласына мейірімділікті ,адалдықты үйретеді.Мөлдір көзді бота өте ақылды болып өседі.
Түйе:
Қара көзің мөлдіреп,
Қызықтырмай қоймайды.
Жібек жүнің үлбіреп,
Қарасам көз тоймайды.
-Боташым, мен саған жақсы достан басқаның бәрін бердім. Енді тура өзің сияқты дос тап. Доссыз өмір қиын,әрі қызық емес. (Ботасы басын изеп тұрады).
Автор: Бота өзіне ұқсайтын жалт-жұлт еткен жүні бар, жағымды үні бар дос іздеп шығады.Ол ойнақтап, секіріп жүрген қозы мен лаққа келеді.
Бота: Бө-ө-ө, мен дос іздеп жүрмін.
Қозы: Мә-ә-ә, мен қошақан қозымын, момақанның өзімін.
Лақ:
Мен лақпын, қандаймын,
Аппақ болған таңдаймын.
Кел бәріміз дос болайық.(Айналып секіреді).
Бота: Жоқ...Жоқ, сендер сияқты дос емес.
Қозы мен лақ: Мүмкін күшік болар.(Бота күшікке келеді).
Күшік:
Гаф-гаф мен күшікпін саққұлақ,
Үй күзетем шапқылап.
Дыбыс шықса маңайдан,
Гаф-гаф! деймін қаттырақ.
Кел,екеуміз дос болайық.(Айналып секіреді).
Бота: Жоқ-жоқ,сендер сияқты дос емес.
Күшік: Мүмкін мысық болар.(Бота мысыққа келеді).
Бота: Бө-ө-ө, мен дос іздеп жүрмін.
Мысық:
Мяу-мяу, мен кәдімгі мысықпын,
Өзім тым пысықпын.
Бәрімен дос болып,
Пырылдаған пысықпын, пыр-р,пыр-р.(Айналып секіреді)
Бота: Жоқ-жоқ,сендер сияқты дос емес.
Мысық: Мүмкін әтеш болар.(Бота әтешке келеді).
Бота: Бө-ө-ө, мен дос іздеп жүрмін.
Әтеш:
Ку-ка-ре-ку! Бұрап қойған сағаттай.
Айқайлаймын таң атпай.
Таңмен ерте тұрамын,
Бәріңді оятамын.Ку-ка-ре-ку!
Кел екеуміз дос болайық. (Айналып секіреді)
Бота: Жоқ-жоқ,сендер сияқты дос емес.
Әтеш: Мүмкін балапан болар.(Бота балапанға келеді).
Балапан:
Мен әдемі балапан,
Біліп қой сен, ботақан.
Достарым бар менің көп,
Кел екеуміз дос болайық.
Жем шоқиық,бірге ойнайық.
Бота: Жоқ-жоқ,сендер сияқты дос емес.
Балапан: Мүмкін ара болар.(Бота араға келеді ).
Ара ызылдап гүлге қонып жүреді.
Бота: Бө-ө-ө, мен дос іздеп жүрмін.
Ара:
З-з-з, ұшып келсем қасыңа,
Менен сен шошыма.
Сен тимесең тимеймін,
Қастығым жоқ, досыма, з-з-з.
Кел екеуміз дос болайық,
Гүл терейік,бал жинайық.(Айналып секіреді)
Бота: Жоқ-жоқ, сендер сияқты дос емес.
Автор: Ара ызылдап қуа жөнеледі.Бота арадан зорға қашып құтылады.Басы салбырап,дос таба алмай,өз анасына келеді.
Түйе: Дос таптың ба,ботам?
Бота: Жоқ ,анашым,сенбесеңіз көктегі күннен сұраңыз,тура мен сияқты, ешкім жоқ екен.
Түйе: Өзің сияқты дегенім, адалдығыңды айтқанмын,боташым. Досты жан тазалығымен таңдау керек.
Автор: Бота қуанып, адал достары қозыны, лақты, күшікті,мысықты, әтешті,балапанды,араны ертіп барлығы бірге «Дос болайық» әнін орындайды.(Көрермендер қол шапалақтайды.Әрбір кейіпкер өзін таныстырғанда алға бір қадам шығып, иіледі).
